2 KA PULIS NAGLATO-LATO SULOD SA SAKYANAN NASAKPAN SA ILANG BANA UG ASAWA NGA PAREHONG PULIS

Mag-atubang og kasong adultery ug concubinage ang mga pulis nga lalaki ug babaye human sila nasakpan sa ilang asawa ug bana nga pulis usab sa dihang naglato lato sulod sa sakyanan sa parkinganan sa usa ka mall sa Laguna niadtong Huwebes, Abril 25.

Base sa report, dugay na nga nagduda ang ilang mga kapikas nga dunay relasyon ang 40-anyos nga lalakeng pulis ug ang 41-anyos nga babayeng pulis ug adunay ranggo nga police executive master sargeant.

Sa dihang nakadawat og impormasyon ang mga mireklamong pulis nga usa ka kapitan ug ang babaye nga adunay ranggo nga Police Master Sergeant, nga ang duha naa sa usa ka mall sa Laguna, dali nilang giadto ang dapit.

Ilang nakit-an ang sakyanan sa asawa sa kapitan diha sa parkinganan ug dihang ilang gitan-aw, ilang nakita sa sulod ang duha ka pulis nga naglato-lato alas 10:00 sa buntag.

Sa dihang gisukmatan sa mga reklamanteng pulis,mipadagan ang duha sa ilang sakyanan ug dasmagan unta ang ilang mga kapikas, apan gipusil sa kapitan ang ligid sa sakyanan sa iyang asawa.

Niambak sa sakyanan ang pulis nga lalaki ug nidagan na unta apan gipusil siya sa iyang asawa ug naigo sa abaga.

Ang asawa sa opisyal nakaikyas ug mipadagan sa sakyanan bisan og na-flat ang ligid.

Niresponde ang ubang pulis og daling gidala ang samdan nga lalaki nga suspek sa usa ka tambalanan sa Laguna,samtang gipangita karon ang babayeng pulis.